dogry

1) Egri däl, gyşyk bolmadyk, göni.

∙ Tüpeňi dogry çenemeklik gerek! (J. Akyýew, Mergeniň ogly)

∙ Dogry gelen keýigiň iki gözünden başga aýyby ýok. (Nakyl)

2) Ýalňyş däl, hakykata laýyk gelýän, çyn.

∙ Dogry düşünjeler köp adamlaryň zähmet işiniň prosesinde emele gelýär. (S. N. Winogradow, A. F. Kuzmin, Logika)

∙ Saklamasaň, gitsem dogry ýol bilen, Ýeterdim maksada, käbäm, atam jan! (A. Kekilow, Saýlanan eserler)

Ýazuw düzgüni: Soňuna çekimsiz ses bilen başlanýan goşulma ýa-da söz goşulyp, ikinji bogundaky dar y çekimlisi gysga aýdylsa, onda ol dodaklandyrylyp (u) ýazylýar.

Meselem dogry - dogruda, dogrular, dogrusy.

◊ dogry gelmek — Miýesser bolmak, saý-sebäp bilen edilmek, gabat gelmek.

∙ Bir säwlik sebäpli şu saparky döwekde tohum atlary ulanmak dogry gelipdir. (A. Gowşudow, Mähri-Wepa)

◊ dogry tapmak — Makul görmek, dogry diýip bilmek.

◊ dogryňdan gelmek — Hakykaty aýtmak.

∙ Gidere ýerim galmady, dogrymdan geleýin! («Mydam Taýýar» Gazýeti)